Eg plagar meg sjølv med å prøva å sjå dette frå andre vinklar.
Altså: Alt det andre er sant. Putin er ein diktator som vil erobra seg til makt, Trump er ein skurk, og Europa er heilt irrelevant i tankegangen deira. Men, grovt.
Det store problemet for USA er alliansen Russland-Kina. To (temmeleg ulike) autoritære regime som passar saman som puslespelbrikker.
Under den kalde krigen greidde USA å driva ein kile mellom Sovjetunionen og Kina (eller: driva kilen djupare). Ikkje at den kinesiske sosialismen var særleg attraktiv for USA, men han var ikkje eit trugsmål på same måte som den sovjetiske. Geopolitisk gav alliansen av "uavhengige statar" (der Kina var viktig) rom for statar som ikkje automatisk hamna inn under den sovjetiske blokken. Dei vart speleområde for konkurransen mellom USA og Sovjetunionen.
Seinare vart produksjon i Kina viktig for Europa og USA, men det skjedde i hovudsak etter den kalde krigen. Det viktige under den kalde krigen er korleis Kina, på finurleg vis, hindra den geopolitiske blokken til Sovjetunionen å veksa.
Presset mot Kina i vår tid byrja allereie for alvor under Obama, og tiltok under Trump etterpå. Det gjorde at Kina utvikla mottiltak. Eitt av desse var å sikra eigne, fullstendige produksjonslinjer, og ein kinesisk-kontrollert infrastruktur i resten av Søraust-Asia. Det andre var å forsterka alliansen med Russland (ope erklært etter vinter-OL). Det gjorde at Russland kjapt kunne ta steget frå å frå å nytta hybrid krigføring og avbalanserte maktmiddel til å setja i gang ein tradisjonell landkrig. I den har dei pressa seg på grensa til kva dei kan tola, og anstrenginga har også svekt Russland betydeleg i Midtausten (særleg i Syria, og dimed også i Libanon).
Dersom Kina hadde vorte med på sanksjonane mot Russland, trur eg krigen kunne vore over langt raskare. Det gjorde dei ikkje. Det kan ha tre grunnar: Anten såg Kina seg betre tent med at heile Europa var opphengde i krigen, eller så var ein eksklusiv adgang til russisk olje og gass så verdifull, eller så hadde ikkje vesten nok å tilby. Kanskje ein kombinasjon av desse.
USA (ved Biden) og Europa greidde altså ikkje å slå inn ein kile den gongen. Men for USA er ein slik kile heilt avgjerande for å møta Kina som verdsmakt.
Kan vi forstå Trumps storsinna avtalemakeri (prosessen ser jo ut til å vera fullstendig uberekneleg, så det er veldig tidleg å konkludera) med Russland som eit forsøk på å slå inn kilen andre vegen, altså byggja det som har vore ein draum (særleg på republikansk side, les gjerne Clancys Bjørnen og dragen) i USA heilt sidan 1990-talet: Ein allianse mellom Russland og USA mot Kina?
) gjør noe som helst annet enn å få dem til å slikke seg rundt munnen og gni seg i hendene. Det hadde vært rørende naivt om det ikke samtidig var så ødeleggende for folk som faktisk skjønner hva et forumtroll er.
