Ei utstilling skal ikkje berre vera å springa frå utstillar til utstillar som galningar med fotoapparat og notatblokk. Me har og eit liv å leva, folk å treffa. Pauser, eta og drikka, treffa fleire, folk me ikkje har sett på fleire år. Utstillarar er mennesker, ikkje berre hifi. Det skal vera hyggeleg. Difor fokuserer eg på dette i år.
“Fyrespelet” står det over ei dør på Osasalen I Voss, Ole Bull-akademiet. Fyrespel er godt gamalt norsk for det som I dag ofte vert kalla vorspiel (tysk), eller berre vors. Verbet vert “å vorse”. Det har eg høyrt ungdomar seia. For ein gongs skuld er det faktisk tysk som vert nytta, ikkje engelsk: Vorspiel og nachspiel. Det er I alle fall dei omgrepa me vaksne nyttar. Dei kan å laga øl, tyskarane; difor. Kva det evt. Heiter på engelsk, anar eg ikkje.
Grunnen til denne lange innleiinga er at me gutane brukar å ha eit førespel fredagen før/når me er på messe. Denne gongen vart det I form av ein demonstrasjon av ein jubileumsmodell frå Klipsch på Oslo HIFI Center, og ein “shoot-out” av tre par høgtalarar heima hjå Karl Erik, med høveleg drikke. Elles er det ikkje førespel, berre arbeid. Sidan det er helg, er det siste utelukka.
Klipsch Jubilee
Om denne kan du lesa på Oslo hi-fi Center sine sider. Lat meg berre notera at to tolvtommars bassar stråler ut bak grillane på kvar si side av fronten, gjennom ein kombinasjon av horn- og bassrefleksopningar. I toppkabinettet stråler ein mellomtone-diskantkombinasjon ut gjennom eit stort horn. Fasongen på høgtalaren (eg måtte bak for å sjekka) er ein kombinasjon av modellen Klipschorn sin trekantfasong for hjørnemontering, og La Scala si flate bakside for plassering langs vegg. Jubilee har og skrånande sider, men eit flatt parti bakst, slik at dei kan brukast I begge situasjonar utan at det ser rart ut.
Høgtalarane er utruleg flotte men ruvande, eg ville plassert dei parallelt med bakveggen slik som på bilda frå Hificenteret; det ser ikkje pent ut når slike svære møblar står på skrå. Det vil og – etter mi meining – låte best slik. Dynamikken var skremmande. Muligens vil Arve eller Karl Erik skriva meir om dette. Eller begge.
Geir Tømmervik var guiden vår, og me hadde ein hyggeleg prat saman etter lytteøkta. Han og Karl Erik hadde ein lengre prat om hifi-en si stordomstid I Trondheim I gamle dagar, då Karl Erik studerte der. Han leikar med planane om å skriva litt om dette.
Les heile messerapporten til Stig Arne i Audiophile.no
