Israel beordrar ny evakuering på Gazastripa
Den israelske hæren (IDF) har beordra ei ny evakuering av område sør og sentralt på Gazastripa. Dei meiner det har vorte fyrt av rakettar frå områda.
Hæren hevdar dei har sendt ut flygeblad og tekstmeldingar til innbyggjarar nord for Khan Younis og den austlege delen av Deir al-Balah, der titusenvis av menneske har søkt flukt frå kampane.
– Førehandsåtvaringa har som mål å minske risikoen for sivile tap og vert sendt ut slik at sivile kan forlate kampsona, seier IDF i ei fråsegn.
Mesteparten av Gazas 2,3 millionar innbyggjarar har vorte driven på flukt fleire gonger sidan krigen mellom Israel og Hamas braut ut 7. oktober, og sjølv i område som har blitt klassifiserte som trygge soner, har det vorte meldt om drepne i israelske angrep.