Hadde min gamle ven Stereo-Stig på besøk her om dagen, og vi gjekk inn som vanleg inn i djupe diskusjonar. Denne gongen var det pickuparmar og justering av desse som var tema. Stig har gjennom erfaring kome fram til at rette armar er betre enn S-forma, medan eg har funne ut at tangentialarmar er best, spesielt når det gjeld romoppleving (eller imaging, som den nynorskbrukande vossingen kallar det). Etter å ha drukke litt øl og krangla ei tid, konkluderte vi med at grunnen til at S-armane er så "dårlege", må vere dei (mange) kreftene ein stakkar (med meir eller mindre hell) prøver å kompensere ved å bruke anti-skating. Anti-skating gjer truleg vondt verre, ved å skape ein resonnans i armen fordi "anti"-krafta verkar bak opphengingspunktet, medan "styggekreftene" verkar framme i kontaktpunktet mellom stift og plate. Antiskating bør verke framme i pickuphuset, konkluderte vi og skåla med godt øl frå mystiske mikrobryggeri. Og kunne deretter bruke tida til å krangle om i kva grad tangentialarmar var det beste, eller om ein kunne oppnå det same ved å bruke ekstra lange armar, der vinkelfeilen vart såpass liten at det ikkje var bruk for anti-krefter....
Dette har fått meg til å på ny uttrykkje mitt gamle ynskje om å teste ein spelar påmontert to armar som er identiske bortsett frå lengda, med identisk pickup (eller høve for lynraskt skifte), Helst ville eg hatt ein Clearaudio-spelar med 9 og 14" utgåve av Unify-armen (desse skiljast berre av ulik armbase og 3,7 gram effektiv masse), men det har så langt ikkje lukkast å finne ein sånn rigg.... 8) Men Stig har ein gammal SME 312, så vi lurer på om nokon der ute har 9"-utgåva av same som kan unnværast sånn på lag eit års tid, medan vi herjar med samanlikningar...
(Problemet med ei slik utprøving, er at vi likevel ikkje vil verte einige om kva som er best av tangential og fastoppheng......men om det er liten skilnad på 9 og 12 tommar, er det grunn til å tru at problema ligg andre stadar enn på vinkelfeilen. Og då må vi sjølvsagt ha meir øl)
